Adura Ààbò
1 Fi agbára orúkọ rẹ gbà mí, Ọlọrun,
fi ipá rẹ dá mi láre.
2 Gbọ́ adura mi, Ọlọrun;
tẹ́tí sí ọ̀rọ̀ ẹnu mi.
3 Nítorí pé àwọn agbéraga dìde sí mi,
àwọn ìkà, aláìláàánú sì ń lépa ẹ̀mí mi;
wọn kò bìkítà fún Ọlọrun.
4 Ṣugbọn Ọlọrun ni olùrànlọ́wọ́ mi,
OLUWA ni ó gbé ẹ̀mí mi ró.
5 Yóo san ẹ̀san ibi fún àwọn ọ̀tá mi;
OLUWA, nítorí òtítọ́ rẹ, pa wọ́n run.
6 N óo rú ẹbọ ọrẹ àtinúwá sí ọ,
n óo máa yin orúkọ rẹ, OLUWA,
nítorí pé ó dára bẹ́ẹ̀.
7 O ti yọ mí ninu gbogbo ìṣòro mi,
mo sì ti fi ojú mi rí ìṣubú àwọn ọ̀tá mi.